MEV_MK_NARR_201201_GBAMO-SE-SE.EAF

MEV_MK_NARR_201201_GBAMO-SE-SE_120

continue phonological words grammatical words See annotation

Àsábèlí.

Lēē nɛ̀ dōó yé ē ló ē gɔ̰̄ sí ā,

lēē nɛ̀ dōó kēŋ̄kēŋ̄ lɛ́ ē ló ē gɔ̰̄ sí ā,

gɔ̰̄ nɛ́ ē kílíɓɛ̄ ē nɛ́ yē nɔ́ dōó, kēŋ̄kēŋ̄.

Là nɛ́ wɛ̄ tɔ́ lɛ́ Gbámɔ́ Sèé Sèè.

Gbámɔ́ Sèé Sèè wɛ̄ ē tó gbāā gɔ̰̄ nɛ̀ wɛ̄ kɛ̀lɛ̀.

Tó gbāā ā ɓō ā kɛ̀lɛ̀ ɓɛ̄ lēē wɔ́ gbāā píé.

Yēlɛ́ gbāā ē ló gbāā ē lēē nɛ̀ dōó sí.

Láà gèē: a̋, ŋ́ŋ̀ nàà ī ká, yà ŋ̄ bà ā,

e̋, ŋ̄ lìē, í dɔ̄ ŋ̄ là.

Mɔ̀kɛ̀ léé ɓɛ̄ bɛ̰̀ɛ̰̄ sɛ̀ɛ̀ mì lɛ̄.

Gɔ̰́ ɓɛ̄ bɛ̰̀ɛ̰̄ ē wɛ̀lɛ̀ gbāā léé ɓɛ̄ bɛ̰̀ɛ̰̄ ŋwɛ́ŋ̀, áà lò gbāā lɛ̀ ɓō wɛ̄ lɛ̄ gbāā lóà à ká gbèkènī.

Ē à ɓō nɔ́ kélɛ̀ zī lɛ́ ò Kìlìkìlì gōō yí gɛ̰̀ ā

ē lɛ̀ ā vòlò, áà yílí vɔ̀.

áà kpàá kɛ̀nɛ̀, ē gbònó ká̰, ɓú yā wā tā.

Mais ɓū gbà̰à̰ ē kɛ̄ gbāā là ɓɛ̄ kɛ̄ ɓū āà wí ɓɛ̄ mɔ̀ɔ̀ áà nù gbāā yí.

áà gèè gbāā ē gbē Gbámɔ́Sèé lɛ̀ɛ̄ zèē áà gèè gɔ̰̄, lō ɓáà mɔ̀ɔ̀ yā ɓáà lùò yē gɛ̰̀ lēē nɛ̀ áà wè kpɔ̀ wì.

Ē ló ē gbàlá dɔ̄ ɓú wɛ̄ là.

Yēlɛ́ ē gbàlá wɛ̄ dɔ̄ ɔ̄ nɛ́fú wɛ̄ à dàā ē yòlòŋ̀ vɔ̄ áà dɔ̀kɛ̀ à kɛ̀lɛ̀.

Yílí gbùò lɛ̄ gɛ̄ɛ̄ gbùò ká à dɔ̄ɔ̀ lɛ̄ zī ŋwū là

Mɛ́nɛ̄ wāà kɛ̄ gó-pìà pɛ̄lɛ́í zàá ā, óò dà-pìà ɲɛ́nɛ́ ɓɛ̄ yílí gbùò wɛ̄ dɔ̄ɔ̀ lɛ̄ yí.

Léé wɛ̄, gɔ̰̄ nɛ̀ wɛ̄ lɛ́ɛ̀ kɔ́nɔ́ kɛ̀ nɔ́ pɛ̄lɛ́í o,

léé wɛ̄ lɛ́ɛ̀ kɔ́nɔ́ kɛ̀ nɔ́ pɛ̄lɛ́í o áà lò à ká o.

Nɛ́fú wɛ̄ gɛ̰̀ à ká o

yé āà ɓɔ̄ nɔ́ yílí gbùò yā dḭ́ mɔ̀ nɔ́ ɔ̄, lɛ́ɛ̀ wàà gbāā yílí gbùò ɓɛ̄ gáná yí.

Tó ē ē kīī ɓō ē mɔ̀, ē kīī ɓōò ē mɔ̀ gbāā à kīī yā āà... parce.que

Ē tó ē támá zóló ɓɔ̀ɔ̄ ká.

donc, áà nɛ́fú ɓɛ̄ súò kɛ̀ gbāā ɓú wɔ̄ mɔ̀.

áà gèè nɔ́ Gbámɔ́ Sèé Sèè, áà gèè nū ɓà ɓū kṵ́.

Nɛ́fú wɛ̄ bɛ̰̀ɛ̰̄ lɛ́ɛ̀ tùò à lɛ̀ɛ̄ áà gèè à lɛ̀ɛ̄ ɓú wɛ̄ yà tá̰à̰ yí.

tó áà gèè gbāā nɛ́fú ɓɛ̄ lɛ̀ɛ̄ yékɛ̀ ŋ́ ɓú wɛ̄ ŋ́ yàá tá̰à̰ ā̰ yékɛ̀ sɛ́lɛ́ é tó á ɓà.

Tó nɛ́fú ɓɛ̄ áà gèè à lɛ̀ɛ̄ sɛ́lɛ́ é tōá ɓà ā, ŋ́ŋ̀ mɛ́ pɛ̀lɛ̀.

à bɛ̰̀ɛ̰̄ áà gèè à lɛ̀ɛ̄ kélɛ̀ à mɛ́ pɛ́lɛ́ɛ̀ láà kɛ̀ tɔ́útɔ̀ù

Bon, lēē nɛ̀fú wɛ̄ lɛ́ɛ̀ gbɛ̰̀ gbāā ɓú wɛ̄ yí,

fááfèlē lɛ̄ gbāā kɛ̀lɛ̀ áà lò gbāā ɓú ɓɛ̄ gbà̰à̰ mɛ̀à sí á ká.

lɛ̄ mɔ̀ɔ̀ lɛ́ ē ɓū ɓèlè-pìà ā.

Tó ē táá gbāā ē ló ē nɛ́fú wɛ̄ kṵ́ gbàlá là lɛ̀í.

Tó ā gbɛ̰̀ tá̰à̰ tó ē nɛ́fú wɛ̄ mɛ̀ ē ē léyíí sùò à là.

à mɛ́ āà ɓā, à mɛ́ āà ɓā, ɓá gɛ̰̀á̰ ā̰ lɛ̀ nɔ́féfé.

tó é nūá pɛ̄lɛ́ ɛ̄ à dàā áà gèè à lɛ̀ɛ̄ Sèé,

áà gèè m̀ḿ?,

áà gèè mɛ́ ē kɛ̄ ī mɔ̀?

Tó wɛ̄ āà pàpá, áà gèè; mɔ̀ɔ̀ lɛ́ɛ̀ nū lūú dḭ̀ḭ̄ o.

ŋwɔ́ lɛ́ léé ā à kɛ̀ à ká ā lɛ́ɛ̀ tùò làá nāā à gèè.

áà gèè: e̋! gɔ̰̄, ɓáà gèē mɔ̀ɔ̀ kpókpó lɛ́ ē nū lūú yí ā?

áà gèè ŋ̀ŋ̀ mon pàpá, mɔ̀ɔ̀ lɛ́ɛ̀ nū lūú ā yí lɛ́ɛ̀ nū kpànākpànāzɛ̀.

māà ló nɔ́ ɔ̄ parce.que ɓū lɛ́ɛ́ bɛ̰̀ɛ̰̄ lɛ̄ zèēzɛ̀

áà gèè "māā kɛ̄ táá-pìà à yí ā yē gɛ̰̀ ŋ̀ ŋ̄ mɛ́ ɓā wē

Mais āà yà nɛ́fú ā yí zì wɛ̄, áà gèè: ḿḿ! fɔ̰́kē ŋ́ ŋwɔ́ wɛ̄ gèē ŋ̄ dàā lɛ̀ɛ̄.

Yēlɛ́ gbāā nɛ́fú ɓɛ̄ ē gó gbāā lūú ɲɛ́ŋɛ̀ píé

à lòkó ē yíí gbɛ̰̀ à lɛ̀ɛ̄ ē ló ē zúlà à ká.

Lɛ́ nɛ́fú wɛ̄ ē ē dàā súò kɛ̄, wàá pèèlɛ̄ ō làpìà.

Láà gèē: pàpá, ŋwɛ́ŋ́ lɔ̀ɔ̄ lɛ́ ɓà kɛ̀ gbāā ā

láà gèē: e̋, màá wāā, lɛ́ɛ̀ nū ɓū wɛ̄ ká, mais āà nū gbāā ká ā lɛ̀ɛ́ kɛ̄ lɛ̀ zí lāā ká ɓɛ̄ o.

Lɛ́ɛ̀ lō gbāā ŋ́ŋ̀ gɛ̰̀ nɔ́ gbāā ē zóló ká kílī yí

āà kɛ̄ māà gɛ̰̀ gbāā ā à kīī ɓōò lɛ̄ gbāā à mɔ̀.

Māà gɛ̰̀ gbāā ŋ́ŋ̀ tùò.

ŋ́ŋ̀ gèē à lɛ̀ɛ̄: ɓú wɛ̄ yà tá̰à̰ yí.

Tó ē wéé yékɛ̀ ŋ́ yàá tá̰à̰ ā̰ sɛ́lɛ́ é tó á bà.

ŋ́ŋ̀ gèē bɛ̰̀ɛ̰̄ sɛ́lɛ́ é tōá ɓú ā bà ā, ŋ́ŋ̀ lō à mɛ́ pɛ́lɛ́ɛ̀, áà gèè: gbāō.

À mɛ́ pɛ́lɛ́ɛ̀ láà kɛ̀ tɔ́útɔ̀ù.

Yé ŋ̀ŋ́ zṵ́ kɛ̄ ŋ́ nū yī ā lɛ́ɛ̀ nū nɔ́ gbāā tó ē ŋ̄ kṵ́ áà ŋ̄ mɛ̀

Áà ē léyíí sùò ŋ̄ là, ŋ̄ lè mɛ́ ē ɓā ā ɓáà gɛ̰̀.

áà gèè: ŋwɔ́ gágà wáá ká.

áà gèè: à ɲɛ̀ɛ̀ kɛ̄ɛ̀ wɔ́ gágà.

áà gèè lō tòò.

Gɔ̰̄ nɛ̀ ɓɛ̄ yélɛ́ ɲɛ́ŋɛ̀īpíé ē kɛ̄ kɛ̄pìà ā áà gbɛ̰̀ ē gà̰ mɔ̀

pɛ́lɛ̀zèŋ́ áà lò.

É ɓɔ̄á léé ɓɛ̄ mɔ̀ ɔ̄ tó ā gèē à lɛ̀ɛ̄: ŋ̄ lòkóò,

wèŋ̄ ɓéŋ́ nɔ̄ ŋ̄ lɛ̀ɛ̄ ké, béì pɛ̰́ɛ̰́ mā yà tíè dḭ̀ḭ̄ ā̰, ŋ́ŋ̀ lō à dàà à mɔ̀.

ō wèŋ̄ nɔ̄ à lɛ̀ɛ̄

nɛ́fú wɛ̄ dàā é lōá nɔ́ é ɓɔ̄á léé wɛ̄ mɔ̀ ɔ̄

tó ē wéé ŋ̄ lòkóò,

Súò ɓéŋ́ nɔ̄ ŋ̄ lɛ̀ɛ̄ kéēké à mɔ̀

ŋ̀ béì pɛ̰́ɛ̰́ lɛ́ mā yà tíè....

ḛ̋ pàpá bɛ̰̀ɛ̰̄ ɓī bɛ̰̀ɛ̰̄ sà̰ā̰ ŋwɔ̀ lɛ́ ɓà kɛ̀ ɓɛ̄.

Áà gèè ŋwɔ́ gáà lɛ́ ŋ̀ gèē wɛ̄ o.

Tó ō súò dɔ̀kɛ̄ à kɛ̀lɛ̀.

Wèŋ̄ nì súò nì pɛ̄ nɔ́féfé ā nāā lōà vɔ̀ kɛ̀lɛ̀.

nɔ́ bímíà ɲɛ́nɛ́ dɔ̄kézɛ̀ ká wā nɔ̄ à lɛ̀ɛ̄

ē tó nɔ́ ē gà̰ mɔ̀ ē nū ā zɔ̰̄

āà bṵ̀ ɓɔ̄ à túú lɛ̄ gbɔ́kò ká.

ē nū gbāā kálémɔ̀ áà gèè ē gbē lɛ̀ɛ̄ áà gèè sòló tòò mɔ̀ɔ̀ wɛ̄ píé

áà gèè pɛ́ lɛ́ ē ī mɛ̀ ɛ̄ māē māà mɛ̀

áà gèè ŋwánà lɛ́ ɓà gèē ā? áà gèè pàpá zí nɔ́ ŋwɔ́ è dìá yē lɛ̄ o, áà gèè māà mā.

gɔ̰̄ nɛ̀fú wɛ̄ ē sòló lààpíé áà lò mɔ̀ɔ̀ wɛ̄ mɔ̀.

Léé wɛ̄ áà gèè: ḿḿ, nɛ́fú ɓɛ̄ āà gó kɛ̀ɛ̀ lóò pɛ́lɛ̀

dɔ̄ ké ŋ́ pɛ̄ ɓéŋ́ kéā kɛ̄ kéā ŋ́ ló ŋ́ dɔ̀kɛ̄ nɛ́fú ɓɛ̄ kɛ̀lɛ̀ mɔ̀ɔ̀ sùù lɛ́ ē nū à mɔ̀ ā

ŋ́ ló nūà à lɛ̀ɛ̄, é à ɓèlè yēmɔ̀.

mɔ̀ɔ̀ bɛ̰̀ɛ̰̄ lɛ́ ē kɛ̄ nū-pìà mīī mɔ̀ ɔ̄ í kɔ́nɔ́ ɓèlè bɛ̰̀ɛ̰̄ lɛ̀ɛ́ ī zò dà.

lēē nɛ̀ ɓɛ̄ āà kɔ́nɔ́ kɛ̄ tólō ē yīè ká

áà lò à ká.

Gɔ̰̄ nɛ̀ ɓɛ̄ ē gbɛ̰̀ nɔ́ gbāā ē nā kōlà mìà, mìà, wáà lò.

mais làá gɛ̰̀ o. Lēē nɛ̀ ɓɛ̄ lɛ̀ɛ́ gɔ̰̄ nɛ̀ ɓɛ̄ gɛ̰̀ o.

Gɔ̰̄ nɛ̀ ɓɛ̄ lɛ́ɛ̀ lēē nɛ̀ ɓɛ̄ gɛ̰̀, ɓīī lɛ̄ líé zàá

é nìá tournant yí ā à bɛ̰̀ɛ̰̄ ē táá ɓéŋ́ɓō ké fɛ̀ɛ̀ mais wà yē ó ɓɔ̄á zī sá̰gbá pìà ā lɛ́ɛ̀ dɔ̄ tá̰à̰.

yé ō tó ló-pìà gbāā ō ɓō gbāā tournant yí léé ɓɛ̄ áà wàà gbāā yílí gbùò ɓɛ̄ gáná yí ā gɔ̰́ ɓɛ̄ ē dɔ̄ tá̰à̰.

Yé ē tó dɔ̄á yí fɛ̰̀ɛ̰̀ lēē nɛ̀ ɓɛ̄ ē ē kīī ɓɔ̄ ē mɔ̀.

Áà gèè kéà ŋwánà lɛ́ ŋ̀ nɛ́ ɓɛ̄ āà gèē gbāā.

Áà lò nɛ́fú ɓɛ̄ píé, āà ē kīī ā ɓɔ̄ ē mɔ̀ āà gbɛ̰̀ gbāā yílí wɛ̄ gáná yí.

REFRAIN

yēlɛ́ gɔ̰̄ nɛ̀ ɓɛ̄ ē kɛ̄ lɛ́ gbāā lēē nɛ̀ ɓɛ̄ ē kɛ̄ ló-pìà gɔ̰̄ nɛ̀fú ā píé ā é ló zéní á mɛ̀ɛ̀.

áà là fáá yā sì áà mɛ̀ à ká, áà mɛ̀ à ká.

Gɔ̰́ nɛ̀ ɓɛ̄ lɛ̀ɛ́ gbāā wéé o,

Gbámɔ́ Sèé Sèè dàā ɓɛ̄ lɛ̀ɛ́ gbā wéé o,

???gbāā lēē nɛ̀ wɛ̄ āà kīī wɛ̄ sí gbāā yílí gáná yí, ā sí ā yà.

Súò bḭ̀ḭ̀ yā áà kàà yī.

Áà súò bḭ̀ḭ̀ wɛ̄ kàà yī, āà bɔ́nɔ́ nɔ́ à ká kílī

lēē nɛ̀ ā bɛ̰̀ɛ̄ làá gɛ̰̀ o.

ē à kīī yā sí nɔ́ ā yà nɔ́ yílí gáná yā yí nɔ́ ɲàà.

à bɛ̰̀ɛ̰̄ áà yɛ̀ ē zí áà nù pɛ̄lɛ̄í.

Lēē nɛ̀ ɓɛ̄ gó gbāā ā ɓō à lɛ̀ mɔ̀ lɛ́ gbāā ē nū gbāā ē wàà ē kīī wɛ̄ yí kɛ̄ é ló gbāā pɛ̄lɛ̄í gbāā

e̋ moyen lɛ̀ɛ́ sɔ̀lɔ̄ ɓō.

á wàá gbāā ē mɔ̀ ɔ̄, e̋, lɛ̀ɛ́ wàà gbāā mɔ̀, āà kɛ̄ gbāā zèēzɛ̀ à mɔ̀, áà gèè: e̋ ŋwɔ́ ɔ̄ ŋ́ŋ̀ lō à kɛ̄ɛ̀ kpɛ̄ɛ̀?

áà gèè: ŋ́ŋ̀ ŋ̄ yí dɔ̄ gágà ŋ́ kīī ɓɛ̄ wàà ŋ̄ mɔ̀.

ŋ́ŋ̀ lō yēmɔ̀ pɛ̄lɛ́í ékɛ̀ ŋ̄ yí é ɓō

ē ē kīī wɛ̄ sí ā wàà ē mɔ̀.

mais à kīī wɛ̄ ē ká̰ gbāā ké pɔ́pɔ̀pɔ̄

Bon yēlɛ́ ē gbɛ̰̀ gbāā lūú zòlō ká

yē lɛ́ è fèlè à kīī yí bāā